• top-banner-1
  • top-banner-1
  • top-banner-1
الخميس 04 شوال 1438 الموافق 29 يونيو 2017
الرئيسية » مقالات » أعمدة » غادة كريم | تكتب : هذه الأسباب تجعلك تخسري الراجل «النسوانجى» ..وأنتي الكسبانة

غادة كريم | تكتب : هذه الأسباب تجعلك تخسري الراجل «النسوانجى» ..وأنتي الكسبانة

Advertisement

عزيزتى المرأة، لما تفكرى تتجوزى ، اوعى تختارى «النسوانجى»  ..

الرجالة تدعى أن الراجل النسوانجى هيعرف ازاى يبسطك  علشان اتعامل مع ألف غيرك وانتى ورقة فى كشكول ترضى ليه تبقى ورقة فى كشكول ملكيش هوية .. زيك زى الف غيرك، ومين قال أنه هيعرف يتعامل معاكى، هوعنده كتالوج واحد بيتعامل مع كلهم، مفيش فستان واحد يبقى على مقاس كل البنات .. تحشرى نفسك فى فستان مش على مقاسك ليه ؟

بيقولوا أن عينه مليانه وعنده استعداد للتوبة أكترمن الراجل اللى نفسه بتتفتح بعد الجواز بالعكس عينه فارغة، ومتعود يبقى رمرام عمرحاجة ما هتملى عينه ابدا، كل الرجالة بعد الجواز بيجيلها هفات نفس مفتوحة ونفس مسدودة حسب عدد السنين ونسبة الكيميا بينهم والخلفة .. هفات الراجل العادى أسهل لأنه ببساطة مش بيطلع لستة ستات من على الموبيل ويحن للماضى المفرفش.

هايعرف يخرجك لاماكن أول مره تشوفيها لكنى أعتقد أنه مش هيوديك الاماكن اللى متعود يخرج مع البنات فيها ليشوف حد هناك أو يفتكر الذكريات، مبروك عليكى كافيه واحد مهجور بعيد عن البشر.

طالما النسوانجى قرر يتجوز يبقى هيكتفى بواحدة ست، دى اشاعة لأنه الزوجة مجرد مرحلة وست تحمل فقط فى حياته لقب.
بيكون فيه حاجه حلوة ، يا اما دمه خفيف او عنده كاريزما، امال اللى قبلك بصوله على ايه؟ .. بصوله علشان نصاب، هتحبى نصاب ليه ؟

مش كئيب، أعتقد كئيب جدا لأنه متعود على العلاقة السهلة، موصلش ابدا للمستوى التانى وقابل الوحش.

بيكون أكثرخبرة من الرجل العادي .. فهو خبير بكل صغيرة وكبيرة، خبرة فعلا، طابورطويل هتتقارنى بيهم، عمرك ما هتعرفى ترضيه زى سعاد واعتماد وفتكات، مستوى المنافسة مستحيل ومتنوع.

 بيهتم بنفسه ، بيستحمى و ريحته حلوة و مظهرة بيكون أنيق دايما، يعنى الراجل اللى مبيعرفش ستات مبيستحماش مثلا !

بيعرف يختار الكلام وعنده فن الإطراء، لا معندهوش ذوق اصلا لأنه اتعود يهين ستات كتير ويعاملهم زى الفراخ ، اطراء لما بيصطادك بس.

ثقة الراجل بنفسه ملهاش علاقة بعددعلاقاته ليها علاقة بدماغه وثقافته وشغله وتدينه وفلسفته الحياتية، بالعكس أحيانا بتتهز ثقته لأن فى ستات كتير كرهته.

مش ممل ، هايخليكى تكتشفى معاه كل يوم حاجه جديده، فعلا مفيش ملل، كل يوم خناقة وكل يوم نزوة جديدة، هتتسلى لحد ما تتشلى.

الراجل عموما كده كده عينه زايغة ، لما تبقى مع واحد عينه زايغه بس معلم احسن ما تبقى مع واحد طربش، الرجالة كده كده سخيفة وهتقرفك، تبقى مع واحد يغلس وبس ولا يغلس واكسترا غلاسة على الوش ستات عايمة فى دماغك على بحر الشك.

كفاية احساسك بس أنه هيسيب كل الحلويات ويختارك انتى، لا يابسكوتة ياحلوة قبلك كحكة وبعد غوريبة، لحد ما هيجيلك أنتى غيبوبة سكر ياشابة.

أهم ميزة أنه لما يقرر يرتبط بيبقى فعليا ناوى يرمى كل حاجه ورا ضهره لأنه شبعان و بيوصل لمرحلة الزهد ويكتفى بيكي ، خديه شبعان أحسن ما يبقى صايم و بعد كده نفسه تتفتح، لا الصايم بيشبع بعد الفطار ولا الفاطر بيصوم، لكن الرمرمة أسلوب حياة .. أنسى أنه هيبطل، هتعيشى طول العمرمروشة بنزواته وبطابور الستات اللى وقفتى فى أخره على باب قلبه، هتعيشى صراع لا بتفكرى فى أحلامك ولا شغلك ولا عيالك، بتفكرى فى البيه اللى لو دخل الحمام بموبيله بيكسر قلبك، ماتسمحيش تبقى ورقة فى كشكول حد بلا هوية .. هيدمر حياتك من اليمين للشمال، متسمحيش لراجل تبقى رقم 72 فى الطابورعلى باب قلبه !!

المصدر

Advertisement