السبت 18 ذو القعدة 1440 الموافق 20 يوليو 2019
الرئيسية » ثقافة و فن » بيت الشعر » فاطمة الزهرة | تكتب : أزمة ضمير

فاطمة الزهرة | تكتب : أزمة ضمير

%d9%81%d8%a7%d8%b7%d9%85%d8%a9-%d8%a7%d9%84%d8%b2%d9%87%d8%b1%d8%a7%d8%a1

عجز القضاء والقدر
عن وصف كلمة حذر
وقف عشان الخطر
وف قلب بيتك مال
دم الجدار ع الشال
الباب بيصرخ مطر
من غير وجود زلزال
الصرخة تجمع بشر
يلحقها ألف سؤال
والصرخة صرخة حجر
الناس ف ميت موال
الحق داب ع الوتر
يعزف مدى الاهمال
لو فكرة فيه اخلال
القتل يبقا حلال
لو يقول إنه بـ أديه
يبقا حق الموت عليه
عندى انا صدق اللى قال
دين ابوهم إسمه إيه؟ !
. .
إسمه كل حق الغلابه
وإلا إسمه سلب سلب
وإلا مبدأهم ف غابة
مالنا ديه مالنا ذنب
ردى يا دموع السحابة
هو يبقا إيه ده قلب ؟
هما يعنى عشان ديابه
إنى أبقا إبن. . .
كلب يعوى مش يخاف
ع القوافل لو تسير
هما يعنى عشر آلاف
ع اللى ميت مش كتير !
ع اللى ميت يبقا عار
العفو مش أحلى انتصار
ب إختصار
وقع العقار
بس روحهم لسه باقيه
واللى باقيه جوه ساقيه
مدى ايدك يااما هاتى / شدى فينا
لو أخدت تمن سكاتى / بكره ييجى الدور علينا
مدى أيدك مش هييجوا
مش هييجوا يلحقونا
احنا بناديلو حتى
حتى طلع عين أبونا
كلو لسه متنساش
جايه تشمت ف اللى عاش
لو هتغرمى حق موتنا
كنتى قولتلهم بلاش . .

كلو فيكى راح بلاش
ثم إنك ثم إنى
ثم ساقيتنا تدور
ثم ايه اللى يعينى
وسط غابة او بحور
ثم عتمة ثم نور
دمى من صرخة جريئة
سمى على ارواح بريئة
تتدفن جوه الصدور
كلهم سن الزهور
واللى قالولك بلادى ف الطابور
تحيا تحيا لو كلام
قبلتك والناس ف ناحية
كلهم عكس الامام
لما ترخص عيشتى فيكى
يبقا ايه الانتقام؟
الفكر بقا جهلنا
ويا التخلف جور
مش ذنبى ولا ذنبنا
يبقا الضمير محظور
وابقوا اسألو أمنا
وأدتش ليه ابنها ويا البنات ف النور. .
طب نعيش جوه القبور؟
يمكن نلاقيه الامان
لو على حقوقهم نثور
يلغوا مبدأ كان زمان
كام التمن يا بشر / بعتو ضميركو بكام
هو السبب كان حجر / والا سبب حكام
ازمه ضمير اتفجر
تحت العماره ونام
والله صابك خطر
احسن ما كنت تموت
وتنفذوا مظبوط / انسى امور تحصين
مكانتش قايله سقوط / أومال دى قايله لمين ؟
اقسم ب دينى الكيل طفح
والهم ماله ميعاد
يا اما تلاقينى اللى اتفضح
يا اما اللى عاش في سواد
كل واحد فينا عايش
بس واحد ف الاحاد
الذنب مش ع الزمن
ولا حتى ع الغشاش
الذنب ع اللى أئتمن
بايع ضميره وعاش
أنسان ماعدلوش تمن
بيعوا الكفن ببلاش. .