في مصر بشكل عام احنا مفتقدين جدا للبراعه في الكلام والرد، اسلوب الكلام في المعاملات اصبح قاسي جداً، فعليا اصبحنا بنتعمد اختيار الكلام الغير مقبول والمنفر جداً ونتعامل بيه مع الناس ومعرفش ايه السبب الحقيقي وراء الظاهره دى؟، المصيبه الاكبر لما بيكون الحديث والكلام في إطار جدال سياسي او رياضي بين مشجعي فريقين او اي شئ تانى، هنا بنلاقي كارثة حقيقية بتؤدى في النهاية لشجار وفي بعض الاحيان للقتل ولا حول ولا قوة الا بالله .
الثقافة العامه اصبحت مبتذله لا سيما من المسلسلات والافلام بنلاقي الشباب والجيل الجديد بيقلد تقليد اعمي بيجسد من خلاله كل صور الجهل لمجرد انتقاء الشباب لاسلوبهم وطريقتهم في الكلام من بلطجى ادى دور في فيلم ما ” بدون ذكر اسماء” ويطلع علينا جيل هو حرفيا مغيب بكل ما تعنيه الكلمة.
احنا مفتقدين لاجمل معانى التحضر والرقي في التعامل ما بينا ، الكلمات ولغة الحوار اخدت منحدر سئ جدا واصبح كمان منتشر وفي ابهي صوره ليه حاليا ، لذلك بنلاقي الخلاف دائم والشجار والقسوه والتعب النفسي شئ عادى بنمر بيه كل يوم وبنخسر ناس كل يوم عادى لمجرد اننا مفتقدين للدبلوماسيه في الكلام وبنستثير غضب اللي بيتكلم معانا سواء بقصد او بدون قصد .
علشان كدا خلي بالك وانت بتتعامل مع الناس افتكر انك مش بتتعامل مع مخلوقات منطقيه لا انت بتتعامل مع مخلوقات عاطفيه ، مليانه شر وكبرياء وغرور وعزة نفس وكرامة وحساسيه وخير وعطف وطيبه عشان كدا لما تشوف صفه او موقف من حد او تذكر عيوب حد او تتفلسف عليه افتكر دايما ان الانتقاد ده حرفيا بمثابة شراره ممكن تسبب انفجار في مخزن قنابل، الفكره اننا فى التعامل نحاول دايما نكسب الصفات الايجابيه ونتعلم فن التعامل مع الجانب الكويس جوه الشخص اللي قدامنا عشان نلاقي منه الكويس ، بلاش نستثير الجانب السئ ولو بكلمه عشان ممكن ينفجر فينا والسبب في الانفجار ده هو احنا بطريقة التعامل السيئه اللي استفزينا بيها الشخص اللي بنتعامل معاه.
لازم نفرق دايما ما بيننا اننا نتجادل وما بين اننا نتناقش مع شخص ما ، الجدال من اسوء الطرق اللي ممكن نتعامل بيها مع اي حد ، كمان الغرض الحقيقي من الكلام والحديث مع اي شخص حاليا بيتلخص في اننا نفرض وجهة نظرنا وده هيكون طبعا معاه اثبات خطأ وجهة نظر الشخص اللي قدامنا ونبين انه جاهل ويتحول الكلام لجدال لا طائل منه ، لذلك افتكر وخليك علي يقين ان وجهة نظرك بتحتمل الصواب والخطأ وكمان حتى لو انتصرت واثبتت مدى جهل الشخص اللي قدامك انت بكده كسرت كبرياءه وكرامته وده هيزيد جواه الكره ليك وكمان لا سيما اقتناعه وتمسكه بوجهة نظره اكتر من الاول ، في حكمه بتقول ” اجبار احد علي اعتناق فكرة ما ..لا يزيد الا من تمسكه برأية حتى ولو كان علي خطأ .
والطبيعي دايما وعلي مدار العمر اللي عيشناه مشوفناش ابدا اي مناظره بين اتنين ف لقاء او برنامج سياسي ان حد منهم اقر انه علي خطأ بل بالعكس الموضوع بيكون اشبه بالحرب و اللي مفيهاش ولا هيكون فيها ربح ابدا ..كمان الجدال بيؤدى للغضب واحنا في اوقات الغضب اسوء ما فينا بيطلع وبنقوله والجدال بيتحول لخناقه ف النهايه وبنخسر كتير من رصيدنا ، “الفزلكه” او الجدال او الشده في التعامل عواقبهم سيئه جدا فنخلي بالنا كويس ونعمل كنترول علي كلمه بنقولها.
الخلاصه .
لازم يكون في لين ومرونه في الحديث والكلام ، لازم نتكلم كلام يجذب الشخص اللي قدامنا و يقربه مننا ونكسبه وليس العكس ، مبدئيا لازم نعرف ان النقاش عمره ما كان لاثبات صحة وجهة نظري ، ولا باجبار الطرف الاخر باعتناق الفكره الخاصه بيا من الاساس ، يا جماعه النقاش الناجح مبني علي التفاهم والمرونه ، النقاش دايما بيكون في انى اسمع وجهة نظر الطرف اللي قدامى وانا بحترمه وبحترم شخصيته وبحترم كلامه وحريص علي الاستفاده منه حتى وان كنت غير راضي عنه الا انه لازم يكون في مبادئ في الحوار ، وعلي سبيل المثال طبعا في فرق شاسع بين دكتور وبين طالب جامعي في انهم بيتناقشوا وبين انهم يتجادلوا ، النقاش مبني علي التفاهم علي التقرب والانصات اكتر من الكلام بين كلا الطرفين ، لازم تخلي كلامك مع المختلفين معاك في الرأي مبني علي الاساس ده ، تمسكك برأيك بشده ومحاولة فرض الرأي ده كفيل انه يكره الطرف اللي قدامك فيك في حين اننا ممكن نكسبه ، كمان الطرف الاخر ممكن يكون ..اب.. ام.. اخ..صديق ، لذلك نخلي كلامنا دايما يكون في اطار النقاش و اسلوبنا في الحديث لازم نركز فيه كويس جدا لانه كمان ممكن يزعل اقرب الناس الينا . افتكر دايما ان الجدال من اسوء الامور ومن اسوء الصفات اللي ممكن تخلي اقرب الناس اليك تتجنب الكلام معاك ، خليك حريص دايما علي ان النقاش يكون بدبلوماسيه وبلاش ننجرف للجدال والتعصب لان النهاية هتكون مأسويه ومش هنوصل للغرض اللي احنا عايزينه ، اختار كلمات طيبه ومهذبه تقدر تجذب بيها و من خلالها الطرف اللي بتتعامل معاه ، كمان خليك حريص دايما انك تكسب الطرف التانى صديق ليك بعد اي دردشه او مناقشه كانت ما بينكم . و افتكر دايما “الجمله” دى وهي اللي هتوصلك لغرضك ومرادك وهدفك واي شئ بشكل عام في حياتك .
ان الله تعالى يعطى علي اللين ما لا يعطى علي الشدة .
المقال لا يعبر بالضرورة عن رأي الشرقية توداي، وإنما هو من رأي القارئ.
تابع الشرقية توداي على جوجل نيوز 
