الحياة الزوجية مشروع كأى مشروع إذا كانت بتنقصه الخبرات والدراسة الكاملة لأركانه والمفهوم الشامل لاسبابه الحقيقية او بمعنى تانى لو مش عارفين يعنى ايه حياه زوجية بالمعنى الحرفى . المشروع ده هيكون فاشل وهيخسر بكل المقاييس .
طيب هل تعلم ان في احصائية مفزعه اعلنها مركز الوزراء ودعم واتخاذ القرار ان فى مصر وصلنا المركز الاول في تسجيل اعلى نسبة طلاق فى العالم . وذلك بمعدل حدوث حالة طلاق كل 6 دقائق وفقا للبيانات والاحصائيات ، ومن وجهة نظرى ان السبب الرئيسى وراء الظاهرة دى هو عدم الوعى لدى الزوجين . قلة الخبره والمعرفة اللي لازم يكون كلا الطرفين علي درايه كاملة وعلم بيها وان كانت من مرحلة ما قبل الزواج وهى “الاختيار من البدايه” ولان اغلبنا من كلا الطرفين مفتقر جدا للمعايير اللي بيكون على اساسها اختيار الطرف التانى ،
بمعنى ” انا مش عارف ازاى اختياري للشخص ده او للانسانه دى هو الاختيار المناسب او لا ” طبعا سؤال مهم جدا لازم كلنا بنسأله لاننا مبنعرفش الطرف التانى كويس او لا ، ولا نعرف عنه حاجه ونبتدى نبحث عن اجابات حقيقية تحدد اختيارتنا للشخص “المناسب” ولان الاختيار لو كان سليم من البداية بكدا بنقصر مسافات كبيره وبنتفادى مشاكل اكبر ممكن تحصلنا بعد الزواج .
لذلك بقول من الافضل “ماتتجوزوش” فعلا ما تتجوزوش
لو فى فترة الخطوبة مفيش فضول انكم تعرفوا عن بعض اكتر . و لو مفيش بينكم حلم مشترك او لو مش مؤمنين بأحلام بعض او على الاقل محترمينها . لو مش ماليين عين بعض . لو مفيش بينكم كلمة سر انتوا بس اللي عارفين معناها . لو مبتفهموش نكت بعض وبتضطروا تضحكوا مجامله . لو مش بتحسوا بالمودة والرحمة فى وجود بعض . لو بتتكسفوا تقولوا قدام بعض كلام عبيط . لو مش بتلاقوا نفسكم فى حواديت بعض . ولو مش هى/هو اللي بيخطر على بالك اول ما تحصلك مشكلة . يبقى متتجوزوش حقيقي لو مش متأكدين من موقفكم بالنسبه لكل الكلام اللي فوق دا . ارجوكم “متتجوزوش”
تابع الشرقية توداي على جوجل نيوز 
