تقارير و تحقيقات

تعرف على المساعدات الإنسانية والاجتماعية لجمعية صناع الحياة بالشرقية

صناع الحياة

كل واحد مننا في الحياة ليه دور بيختاره يعيش علشانه بيسعي، ليه ويحققه، احنا اختارنا نكون صناع الحياة.

علي مدار 13 سنة فاتوا واحنا بنحاول نكون جنب كل الناس المحتاجة، ونساعدها مشوار طويل ابتدا سنة 2005 وجهد كبير اتبذل ولسه عندنا طاقة أكبر من اللي فاتت عشان نوصل الخير لكل مكان.

كل سنة بيقابلنا تجديات كتير أولها بيكون ازاي نعدي موسم الشتا بشكل آمن علي الأسر، عشان كده عملنا حملة دفا الشتا، وقدرنا في شتا 2016 2017 اننا نوزع 500 بطانية و500 كارتونة من المواد الغذائية وننفذ 20 سقف لـ 20 بيت يحميهم من مطر الشتا.

وحاليا في شتا 2017 2018 قدرنا نوفر 700 بطانية وننفذ 30 سقف، ولسه مكملين لنهاية موسم الشتا في شهر فبراير الجاي.

أفكار كتير بتجلنا وبنرسمها قدامنا وبنحاول نعمل هيكل منظم لتنفيذها، وخاصة في شهر رمضان، عشان كده ركزنا على نوع من المساعدات المختلفة عن أنواع الدعم الموجودة في الوقت ده، بحيث أننا نساعد الأسر المحتاجة إنها تعتمد على نفسها في توفير احتياحتها الأساسية بدون الاعتماد على التبرعات والإعانات.

فاطلقنا مبادرة رزق حلال للسنه الثالثة على التوالي، وقدرنا في رمضان 2017 مع 2000 متبرع و 400 متطوع داخل محافظة الشرقية اننا نوفر 100 مشروع صغير ل 100 أسرة محتاجة.

وبعد انتهاء شهر رمضان من الأفكار اللي اهتمت بيها صناع الحياة في 2017، هو سد عجز بنك الدم، وان نقدر ننفذ حملات تبرع بالدم للفصايل المختلفة والنادرة، عملنا حملة شريان بالتعاون مع المركز الاقليمي لبنك الدم بالشرقية، وعملنا 25 حملة تبرع بالدم في 8 مراكز في الشرقية وفرت من 1500 متبرع 1500 كيس دم.

فكرنا موقفش على دعم الكبار بس، بالعكس كمان الأطفال من خلال استحداث فكرة منتصر ينتصر، وهي منهج تعليم صحي للأطفال إزاي نقدر نعلمهم طرق الوقاية من أمراض الإلتهاب الرئوي وغيرها من الأمراض، من خلال مواد مختلفة زي كتب رسم وطريقة شرح الاطفال داخل المدارس الإبنتدائية والحضانات.

وبالفعل تم تقديم التعليم الصحي لـ 5191 طفل في 40 حضانة في 7 مراكز من محافظة الشرقية، والمشروع يعتبر بذرة لايجاد منهج تربوي صحي متكامل في المستقبل للاطفال.

وخلال سنة 2017 على فترات متباينة، حركنا قوافل الدعم والمساعدات في قري المحافظة اللي نفذنا من خلالها أكثر من 200 معرض ملابس خيري في 100 قرية، وتجهيز أكتر من 20 عروسة وسداد حالات ديون ووصلات مياة وإعمار مساجد وتوزيع أكتر من 1000 شنطة مواد غذائية.

2017 سنة مثمرة لشباب صناع الحياة قدروا خلالها يوصل الخير للناس اللي حوليهم، ولسه قدامنا مشوار كبير في 2018 عشان نكملة بأهداف أكبر وأكتر في صناعة حياة كريمة للناس المحتاجين.

وعلى مدار السنين الطويلة اللي فاتت اتبذل فيهم وقت وحهد كبير جدا، علشان نحاول ندعم اهلنا ونانسنا.

فكرة صناع الحياة بتقدم حلول وأفكار للمشاريع التنموية اللي بتواجه مجتمعنا، ومشكلات الفقر والجهل والمرض، وبتصنع حالة من حالات التوازن الاجتماعي.

أحمد سمير

أحمد سمير حاصل على بكالوريوس إعلام جامعة الأزهر .. أعمل بمجال الصحافة منذ عام 2015 .. عملت في موقع الشرقية توداي كاتب صحفي .. وصحفي فيديو .. وحاليا محرر صحفي .. عاشق للتصوير والمونتاج والإخراج
زر الذهاب إلى الأعلى