مقالاتمقالات القراء

محمد الشافعي | يكتب : إزاي تبدأ مذاكرة و أنت ملكش نفس ؟

الشافعي

المقال طويل شوية بس أوعدكم أنه مهم جداً ، جرب تقرأ بتركيز للنهاية هتستفاد عقلك بيحب المعايير يعنى إيه الكلام دا ؟ عقلك عايز يعرف سبب للى إنت بتعمله ، انتبه للموضوع دا متتجاهلش إحتياج معرفة عقلك للى بتعمله لأنه لو عرف الأهمية هيساعدك جداً توصل للى إنت عايزة .

جرب تسأل نفسك دلوقتى هو ليه بنذاكر ؟ فى الغالب فى إجابة معينة إنت بتفكر فيها دلوقتى وكل مرة حد يسألك السؤال دا هتجاوب نفس الإجابة ، عارف ليه ؟ لأن المذاكرة بالنسبالك اتحولت لمجرد روتين وأى حاجة روتين للأسف بنزهق منها وبنتعامل معاها بسخافة جداً زى ما كلنا بنتعامل مع المذاكرة دلوقتى .

بعضكم بيقول لنفسه دلوقتى إيه لازمة المقدمة دى يعنى ما احنا كلنا عارفين ده ، أدخل فى المفيد ولخص إحنا عندنا مذاكرة ، براحة عليا بس لـن اللى بقوله دا لا يقل ـهمية عن اللى هكتبه خليك ماشى معايا واحدة واحدة ، لو حابب تفهم اللى ـقصده ـنصحك تقرأ المقدمة مرة تانية لـنك لما تكمل البوست بفهم هيفرق معاك كل كلمة ، لو أنت من الناس اللى بتهتم بفكرة التعلم فـ أكيد فهمت اللى أقصده فوق.

هتقولى أيوا بعد كل دا المفروض أعمل إيه يعنى ؟ هقولك طول ما أنت بتتعامل مع المذاكرة على إنها حاجة مفروضة عليك هتفضل مضايق منها وممكن توصل لدرجة إنك تكرها كمان .

جرب تذاكر بهدف الإستفادة وليس بهدف إنك تتخلص من الضغط اللى حاسس بيه ، تأكد أن الضعف دا هيروح نهائى لما الموضوع يتحول عندك لحالة من الاستمتاع ، دا هيوصلك لأنك يكون عندك رغبة ملحة للتعلم وهتبقى شايف أن كل ساعة بتقعدها مع الكتاب هى إضافة لك وليس عليك ، لأنك هتحصل معلومات جديدة هتستفاد منها فى حياتك .

الموضوع بالنسبالك هيتحول من كون إنه مذاكرة بهدف الدش فى الامتحان وتخرج من الامتحان لو حد سألك سؤال فى اللى أنت كتبته أعتقد هتقوله بلح فى الوقت دا ممكن تحس إنك كنت مسجون وبتحرر نفسك بكلمة ناجح .

التعليم فى الخارج بيساعد الشخص إنه يبدع ويطور ويبتكر حاجات جديدة ، بس كل ده بيحصل لأن الطالب حابب اللي بيتعلمه ، إنما إحنا الموضوع مختلف عندنا لأننا كـ أشخاص خلينا المذاكرة فى حياتنا مجرد روتين فـ بالتالى بنتعامل معاها أسوأ معاملة .

فى الوقت اللى هتتعامل مع الكتاب على إنه الحاجة اللى بتوصلك لحاجة من حالات الاستمتاع هتحس أن الكتاب وقتها مش مفروض عليك بل إنت اللى هتفرض نفسك عليه لأنك محتاجله .

تعرف الكلام ممكن يكون بالنسبالك خيالى شوية ، أو رخم حبتين ، بس تأكد إن إحساسك بسبب إنك بقيت بتقدس الروتين ومبسوط باللى إنت فيه حتى لو من جواك مضايق منه ، بس هتبين إنك مبسوط علشان تهرب من الحاجة اللى هتفضل تفكرك تبذل مجهود و تسعى علشان توصل للى إنت عايزة .

اللى حبيت أوصله من المقال دا ، أن أى كلام هيتقال مهما كانت قوته ، هتعتبره غير مؤثر على الإطلاق لو محاولتش تطبق الكلام اللى فوق ، جرب تنصت لـ صوت ضميرك هتعرف قد إيه إنت مقصر بس تأكد مهما كنت متأخر لسه عندك فرصة تبدأ .

البداية فى أى حاجة صعبة بس هى سبب سهولة كل الحاجات الصعبة ، البداية تعنى السعى تعنى تغيير حالة الركود لحالة من النشاط .

لو فهمت اللى أقصده من البوست ينوبك الثواب حاول تطبقة لأن المعرفة لوحدها مش كفاية وكمان حاول توصله لغيرك جايز يفرق معاهم ويساعدهم يغيروا المود اللى هما فيه دا ولو الموضوع لسه مش واضح لك جرب تقرأ تانى بتركيز أكتر .

shady zaabl

كاتب صحفي مصري مهتم بالمواقع الإلكترونية وإدارتها وكتابة المقالات في جميع الأقسام وذو خبرة في الصحافة والإعلام والمحتوى لـ 5 سنوات وفقً لدراسة أكاديمية وتطبيق عملي .
زر الذهاب إلى الأعلى