معظمنا بيكون حابب يحس أنه مهم في حياة الناس وكمان نفسه يساعدهم بأي طريقة ومن أكتر الطرق اللي بنعملها إننا بنسمع لمشاكل غيرنا بشكل متكرر دا في حد ذاته حاجة كويسة إذا كان الدافع اللي بيخليكم تعملوا كده هو المساعدة.
بس حد فيكم تخيل قبل كده أنكم تسمعوا لمشاكل غيركم بشكل متكرر دا من أخطر الحاجات اللي بتسبب تدمير نفسية الشخص إذا كان الشخص دا غير متخصص في حاجة زي كده.
اللي بقوله دا ممكن يكون صادم للبعض ، ويكون للبعض الآخر مجرد تعارض لافكاره وأسلوبه اللي طول الوقت بيحاول يساعد الناس وشايف أن دي حاجة مهمة أنه يسمع مشاكلهم .
عايزك وأنت بتقرأ الكلام تفكر بعقلك بعيد عن المشاعر اللي ممكن تكون رافضة اللي بتقراه ، تخيل كده معايا الفرق بينك وبين الشخص المتخصص في مجال life coaching.
الشخص العادي بيتأثر وأحنا في الغالب بنعيش أوي في مشاكل غيرنا ونحس إحساسهم وكأن المشكلة خاصة بينا على الرغم أن الشخص دا بيحكيلك تساعده وتقوله حل يخفف عنه مش تبقى زيه.
المتخصصين فيه life coaching ببستقبلوا مشاكل كتير وقادرين يتعاملوا معاها ، لأن عندهم أسلوبهم الخاص اللي بيحافظوا بيه على نفسهم من أنهم يتأثروا بالمشاكل اللي بتتعرض عليهم بشكل يومي .
حابب تسمع لغيرك اسمع ولكن يكون أقرب الناس لك ( أخ ، أخت ، قريب ، صديق ) غير كده اللي يطلب تسمع مشكلته وأنت من جواك حابب تساعده الأفضل أنك تعرفه بشخص متخصص يساعده يخرج بحلول عمليه بعد ما يحكي.
لو انت شخص غير متخصص حابب تحمي نفسك تعمل أيه؟ اسمع بعقلك دون التركيز مع مشاعرك .
* أفصل نفسك عن المشكلة نهائي.
* لما تحس أنك متأثر أوي فكر نفسك بأن المشكلة مش تخصك.
* أول بأول استغفر ربنا ، و كمان الدعاء مهم جدا بأن ربنا يحفظك.
* أول ما الشخص يخلص كلامه حاول تغير مكانك ، تطلب تقوم تعمل حاجة وترجع الهدف من النقطة دي أنك تفصل علشان تقدر تتكلم معاه بعقلك مش مشاعرك .
* لو الشخص متأثر ممكن تأجل النصيحة لوقت يكون فايق انه يسمعك لانك ممكن تقوله حاجات مهمه بحكم خبرتك لو كنت مريت بحاجة مشابه باللى بيقوله .
* حاول تفصل بين المشكلة اللي الشخص فيها وبين شخصيته اللي تعرفها قبل كده توضيح أكتر فرق كويس بين ( الشخص ، السلوك ) لانه ممكن يكون في حالة ضعف ونتيجة للي بيقولة تغير رأيك فيه فإنتبه للنقطة دي .
*وأنت بتقرأ الكلام فكر في كل نقطة لأن الموضوع على قد ما أنت شايفه بسيط ولكنه على المستوى الشخصي بيأثر في الحالة النفسية لكل شخص غير متخصص بيعمله .
*اشرحوا لنا تجاربكم في الموضوع دا كام مره حصل معاكم وعملتوا ايه؟
قرأت الكلام ووصلت لحد هنا ، لحظة كده معايا شايف أن اللي قرأته مهم ؟ بتفكر في الإجابة ؟ لو اه مهم بعد ما تخلص قراءة ابدأ اتناقش فيه مع صحابك وعرفنا وصلتوا لايه مع بعض.
صحتك مهمة زي مساعدتك .
الآراء المنشورة تعبر عن وجهة نظر صاحبها ولا تعبر بالضرورة عن رآي الشرقية توداي.
تابع الشرقية توداي على جوجل نيوز 
