ثقافة و فن

مي حلمي تكشف تفاصيل إلغاء حفل زفافها من محمد رشاد: الحب مابيتبعش

مي حلمي تكشف تفاصيل إلغاء حفل زفافها من محمد رشاد
مي حلمي ومحمد رشاد

كتب | شادي زعبل

نشرت الإعلامي مي حلمي كواليس إلغاء حفل زفافها من المطرب محمد رشاد قبل ساعات من الزواج والتي آثارت جدلاً واسعاً .

وكانت مي حلمي قد دخلت المستشفى بسبب إلغاء حفل الزفاف وأشيع أنها أصيبت بأزمة قلبية ومنهم من قال أنها جلطة وفقاً لبعض صفحات التواصل.

وقالت «حلمي» عبر صفحتها الشخصية على موقع «إنستجرام»: «مش عايزة أتكلم في أي حاجة غير عن وجع كسرة الفرحة، ولا إعلام ولا ميديا ولا دنيا ولا مين شمتان ولا مين فرحان مش فارقلي، كلنا بندور على الفرقعة على السبق اللي يضرب بس لو هتكلم عن نفسي عمري ما هعمل كده وقت غياب فرحة حد ومش أي فرحة دي فرحة العمر زي ما بيقولوا.. إزاي قدرتوا تعملوا كده لكل الناس وأولهم القريبين».

وتابعت: «إزاي قدرتوا تقولوا كلام غلط وحكايات ماحصلتش، إزاي سبتوا فرحتنا على جنب، طيب هقولكم عارفين يعني إيه بعد ما ألبس فستاني أقلعوا؟ بعد ما خلاص خطوة واحدة من ٤ سنين مستنياها تبوظ بسبب الناس اللي نقلت كلام غلط مش هقول الميديا، الميديا طول عمرها كده وقبل ما أشتغلها وأنا عارفة إنها كده، نتكلم عن الناس الطبيعية، إزاي قدرتوا تشمتوا وتفرحوا في وجع غيركم واللي يدعي واللي يضحك واللي يقول أحسن، فهموني انتوا بني آدمين، بتخافوا ربنا؟».

واستكملت: «طيب حتى لو نفرض وده فرضا إن حد من الطرفين غلطان ليه الدعا عليه والحسبنة ليه أصله مش زرار هتقوم من النوم تدوس عليه فهتنسى العشرة والسنين وتقعد تدعي وتهين، لا لا أبدا مهما حصل بتلاقي نفسك مش طايق كلمة وحشة على الطرف التاني، ونفس الكلام للطرف الآخر، بعد الهيصة والزيطة مابيفضلش غير الحلو وبيبان الوحش، بس كل اللي عايزة أقوله الشدة بتبين، في الآخر حبيت أخرج كلام جوايا من اللي شوفته اليومين اللي فاتوا».

واستكملت: «والله والله ما فرق معايا غير فرحتنا أنا وهو، مش أنا بس اللي اتكسرت، فستاني اللي قلعته، بدلته اللي اتقلعت، ومحدش فاهم حاجة أهالينا اللي زعلانين علينا ماكنتش ناوية أتكلم، بس كلام جوايا وكنت عاوزه أقوله محدش بيرضى في عشرة عمره لو عامل فيه إيه مابيرضالوش الوحش ولا دعوة واحدة بالغلط عشان ماحدش كان عارف إيه اللي حصل معظم الناس كلمها (أنا كنت هناك.. أنا كنت حاضر.. أنا كنت شاهد)، كنت دعيت ربنا يهدي الدنيا ويجمعهم في الحلال بدل ما كنت حكيت اللي سمعته مش اللي شوفته، إحساس صعب فرحة عمرك تتكسر قدامك بعد سنين مستنيها ساعتها ولا بيفرق شكل من كلام ناس من دنيا».

واختتمت كلماتها: «فرحة فستان بتاعة الراديو راجعة راجعة، إن شاء الله هنحكي كل حاجة وهنقول كل حاجة بس في الوقت اللي إحنا عايزينه مش اللي الناس عاوزاه، نصيحة من قلبي لكل اتنين متجوزين عايزين يسيبوا بعض، لكل اتنين مخطوبين، لكل اتنين بيحبوا بعض (الحب مابيتبعش) ولو ضيعتوه والله مابييجي تاني امسكوا فيه مهما حصل.. أكيد هنطلع ونتكلم بس أدونا شوية فرصة مع بعض بعيد عن الأضواء.. وعاوزه دعوة حلوة لينا أرجوكم».

 

 

shady zaabl

كاتب صحفي مصري مهتم بالمواقع الإلكترونية وإدارتها وكتابة المقالات في جميع الأقسام وذو خبرة في الصحافة والإعلام والمحتوى لـ 5 سنوات وفقً لدراسة أكاديمية وتطبيق عملي .
زر الذهاب إلى الأعلى