«عايزين نوصل للمجتمع إن القمامة لها ثمن، ونزرع فى ولادنا ثقافة جديدة، لأن هما اللى هيغيروا المستقبل.. عشان مفيش جهة فى مصر عرفت تحل المشكلة، هنحلها إحنا وبفلوسها ناس هتشتغل وناس هتتعلم»، بتلك الكلمات بدأت أولى فعاليات مهرجان «الزبالة»، احتفالاً باليوم العالمى للبيئة، تحت رعاية مؤسسة آدم للتنمية، التابعة لوزارة التضامن الاجتماعى، فى مخيم الكشفى بالمعادى.
ويهدف المهرجان إلى ترسيخ فكر جديد فى المجتمع وهو عملية فصل المخلفات من المنبع وإعادة تدويرها، والاستفادة من عائدها فى تعليم أطفال البدو حرف مهنية.
وتتضمن فعاليات المهرجان افتتاح أول كشك دائم لشراء المخلفات، وعرض أزياء بأوراق الصحف والمجالات وأكياس الحلوى، بجانب ورش تعليم «لإعادة تدوير المهملات».
ويقول عماد حواس رئيس مؤسسة آدم: «عندنا هدفان من المهرجان مادى واجتماعى، المادى إن إحنا بنستقبل القمامة من الناس وبنعلمهم إزاى يعيدوا تدويرها فى أشياء مفيدة، والحافز الاجتماعى إن بفلوسها بنعلم أطفال البدو اللى اكتشفنا إن كلهم مش متعلمين لكن بنعلمهم حرف فنية يكتسبوا منها على حسب رغبة آبائهم».
وتستمر فعاليات المهرجان لمدة ٣٠ يوما بهدف نشر الفكرة، ونزول الشارع والتعامل على أرض الواقع، ويوضح «عماد»: «هننزل فى المؤسسات والمدارس والجمعيات على مدار الشهر ننشر الفكرة ونعلم الناس وبعدها هنفتح محل لجمع الزبالة من الناس وإعادة تدويرها وبيعها».
المصدر
تابع الشرقية توداي على جوجل نيوز 
